भक्तपुर
भक्तपुर नगरपालिकाका प्रमुख सुनिल प्रजापतिले भक्तपुर नगरपालिकाको आयोजनामा आजबाट सुरु भएको भक्तपुर नगरव्यापी विद्यालयस्तरीय राष्ट्रपति रनिङ शिल्ड खेलकुद प्रतियोगिताको उद्घाटन गर्नुभयो ।
कार्यक्रममा बोल्दै उहाँले खेलकुदलाई मानव जीवनको अभिन्नको अंगको रुपमा विकास गर्न समय समयमा खेलकुद प्रतियोगिता, शारीरिक व्यायाम प्रशिक्षण र विद्यालयस्तरमा खेलकुद प्रतियोगिता आयोजना गर्दै आएको बताउँदै भक्तपुर नपाका खेलाडी तुलनात्मक रुपमा अनुशासित रहेको बताउनुभयो ।
खेलकुद अनुशासन र मित्रता बढाउनको लागि खेल्नुपर्छ भन्दै उहाँले खेलकुदमा हारजित स्वाभाविक हो भन्दै हारबाट सिक्ने भावना हामीमा हुनुपर्छ भन्नुभयो ।
आफूसँग भएको क्षमता समयमा प्रदर्शन गर्न सकिएन भने अगाडि बढ्न बाधा पुग्न सक्छ भन्दै उहाँले खेलकुदमा समय व्यवस्थापनले महत्वपूर्ण भूमिका खेल्छ भन्नुभयो ।
खेलकुदसँगै आफ्नो शिक्षामा पनि उत्कृष्टता हासिल गर्न प्रेरित गर्दै उहाँले खेल जित्नको लागि र सिक्नको लागि खेल्नुपर्छ भन्नुभयो ।
कार्यक्रममा भक्तपुर नपाका उपप्रमुख रजनी जोशीले खेलकुदले शारीरिक र मानसिक रुपमा स्वस्थ बनाउने हुँदा हरेक नागरिक खेलकुदमा सहभागी हुनुपर्ने बताउनुभयो ।
भक्तपुर नपा वडा नं. १ का वडाध्यक्ष श्यामकृष्ण खत्रीले माघ २ गतेदेखि ४ गतेसम्म सञ्चालन हुने राष्ट्रपति रनिङ शिल्ड प्रतियोगितामा सहिद स्मृति खेलमैदानमा भलिबल, लिबाली कभर्ड हलमा कबडडी, भाज्या पोखरी परिसरमा एथ्लेटिक्स, लिबाली कभर्ड हलमा तेक्वान्डो, देकोचा कभर्ड हलमा कराँते र लिबाली कभर्ड हलमा उसु खेल हुने जानकारी गराउनुभयो ।
उक्त कार्यक्रममा भक्तपुर जिल्ला खेलकुद विकास समितिका अध्यक्ष राजु थापा, कार्यपालिका सदस्य सुनिता अवाल र रञ्जना त्वातीले पनि बोल्नुभएको थियो ।
प्रमुख प्रजापतिले प्रशिक्षक राधेश्याम कवांलाई खेलकुद सामाग्री हस्तान्तरण गरी कार्यक्रमको उद्घाटन गर्नुभएको थियो ।
